هذا ثمر قلبي تدلى قبل .. ياتي موسمه
مدي يدينك واجمعي فرقاك من عذق العتب
أنا ثملت من الفراق اللي خذا وجهي سمة
شوفي ملامح غيبتك تقرا قبل لا تنكتب
في وجهي الشاحب وفي آهات صدري ونسمه
في ناظر عيونٍ هميل الوجد منها ينسكب
يا نور لحظاتٍ غدت من دون وجهك معتمة
وينك؟! بدا هذا الحنين بجوف صدري يحتطب
ياحبٍ اجتاح الضلوع وفج قلبي وقسمه ..
نصفين..وازريت اجمع النصفين وغيابك سبب!
حبٍ بقى لو واقعه مرة بحاليه.. صدمه
عشقٍ حيا رغم العطش في روض روحي معتشب
ليت الغلا ذنبٍ تجناه الخفوق ويندمه
وليت الصبر جرمٍ اليا طاولت همي يُرتَكَب!
إلى متى وأنا اهين الوقت وأرجع واحشمه؟
وأنا على رجم الوصال اشرف.. وانادي.. وارتقب
يا ام العيون الفاترات الناجلات المغرمة
يا من رموش عيونها تشكي سبب عكش الهدب
يامبسمٍ له ضحكة ٍ تنطق بشيٍ تبهمه
يانبرةٍ لا من حكت كل المعاني تنقلب
ياللي خذيتي خافقي قبل اعرفك واقدّْمه
ياللي غيابك لحنٍ تغني به أعواد القصب
عودي على قلبٍ طواه الهم والشوق هزمه
قلبٍ معك غنايمه ضاعت ولا ادري وش كسب؟
أنا انتهيت وشوقي بصدري بدت له همهمه
جمر انتظاري سَمّدت ناره وانا صرت الحطب
حتى ثمر قلبي تدلى قبل ياتي موسمه
هزي طرف جذعه تساقط لك من عذوقه عتب!
للشاعر الرائع/صالح السكيبي
أنــــــــــــــــــــــ(الغريب)ــــــــــــــــــــــا
هناك تعليق واحد:
اللهم لك الحمد
تبض الحياة
إرسال تعليق